قصيدة للشاعر محمد منذر ألقيت بختام مهرجان الجولان في عيوننا

570

جولان المهرجان ٢٠١٧

مساكم خير يا كنزي الخيالي …… حلاكم من حلا كروم الدوالي
يا بسمة طهرها بيشتاق لينا ………… يا أسرار القصيد الإرتجالي
مساكم عاطفة فيها إبتدينا ……….. وشوق محب لعيون الغوالي
غبنا عام ورجعنا إلتقينا ………….. ع ذات الأرض وبذات الأهالي
والجولان يا ساكن عينينا …………….. بأربعطعشنا طلبنا العدالي
كسرنا القهر وشبكنا يدينا …………….. بمجد الأم وضوينا الليالي
زرعت فينا الوفا كلما إعتلينا ……… بوثيقة سرها تخطى الأعالي
بتبقى عيدنا الغالي علينا …………. وما رح يبلغ وفانا المجد ذاتو
إذا مش رح نحافظ للأصالي

وع منبر مجد السويدا الكريمة ……………. أخذنا بمهرجان العز قيمة
مثل جولاننا الغالي إعتنقتك ……………… يا ريان القلوب المستقيمة
إرتجلتك سيف ع الخصم إمتشقتك ……. زرعتك نصر طمينا الهزيمة
كتبتك شعر للدنيا طلقتك ……………… إرتديتك روح توجتك نديمي
بيوم المزرعة ثورة عشقتك ……………. بفوارس كسرت الإيد الأثيمة
حفظتك درس خالد من ورقتك …….. وعلى الجولان شديت العزيمة
ياصدقي المقت هلق صار وقتك … بجهدك وضحت خيوط الجريمة
يا جولان إنكتب بزنود مقتك ……………… رسالة نسر عاشق للكرامة
حمل بالقلب سورية العظيمة

ويا صدقي وصحبتو الأبطال طلوا … على هالمهرجان وروض فلو
الشب اللي صدق وعدو بثباتو …………. فارس بس حقو ما وصلو
دخلك مين سابق تضحياتو ………………. لأسير بلادنا العشنا بظلو
نسور المكرمة ضحوا وماتوا ……… وبقي مجد الوطن ثابت محلو
نزيه الكان كاتب ذكرياتو …………….. ع صخر العز ومبيض سجلو
وهايل خزق الموت برفاتو …………… كتب درس البطولة ع مطلو
وسيطان الكبير المن سماتو ……….. التواضع والنصر اسمو احتلوا
شواهد نور هني الفجر ذاتو ……….. وبسفر المجد راية مجد علوا
وبشر وعاصم ومدحت حماتو ……….. لموطنا الإلو صاموا وصلوا
وأمال وبشيرة نجوم باتوا ………………. براية سورية وفيها تعلوا
وأسامي بيعجز الفكر ونواتو …… بضميري مين ماتوا ومين ظلوا
أسير بلادنا قدم حياتو ……………. فني عمرو على بساط المبادي
وفدى جولاننا والشعب كلو

وتعالوا شوي نحكي بالفراسة… شو بدنا بالسياسة وبالكراسي
القال إنباعت الجولان يسمع …….. كلامو بلا تروي ولا دراسي
إسرائيل عم تقتل وتقمع ………….. وتزرع طائفية بنهج راسي
تا يصفى كنزها الأغلى وأرفع … جبل حرموننا وحوضو الأساسي
إنت يا شيخنا النبع المدمع ….. كتبت فرض الشريعة والقداسة
جمعت ولادك ببيت المشعشع ….. ثلاثي سحر والنسمة مراسي
اللداني الحاصباني المدلع ……… ونهر بانياس نادوا بكل طاسة
ع كرسة طهر يوحنا المرصع ………. تعمد مجد ياسوع الرياسي
واليرموك منهج بحث أوسع ……… لشلالات فيها الطيب راسي
والحمة وهواها الما بيركع …….. ودواها الكتف كفوف النطاسي
ونهر سعار بالغلات شبع ………….. بساتيني وما كان بيوم ناسي
وبحيرة مسعدة أجمل وأروع ……. وطبريا السقت بالحب كاسة
والحولة القلب منها توجع ………… بعد ما جففوها بظرف قاسي
وخمسمية نبع أغنى وأبدع …… كرم من طهر أرضي وطهر ناسي
كرم مياتنا مفروض يقطع ………….. مرج كنعان بالحجم القياسي
وإسرائيل عم ترشي وتدفع …………… لثروة والربح بدو حماسة
يعني مية الجولان مرجع … الشمس مش رح بتحجبها الشماسي
أفهم هيك يا شعبي وإقنع …………. ما بدنا نظل نحكي بالخيانة
ولا بدنا نظل نحكي بالسياسة

وبآخر كلمتي بجو الإثارا …………. إسمحولي أشكر الأهل الغيارا
رغم ما ظروف موطنا عسيرة …………. لكن جودكم عبى الكوارا
(فيصل المحيثاوي) يا عشيري ………. إنت جنح الأصالة الما توارا
و(وائل) بالسنوات الأخيرة …………. ع جنبك كان فارس لا يُجارا
و(سلمان) الغني بنفسو الكبيرة ………… كنز ألماس ضوا ع المنارا
و(مشغل نورسين) الذاب غيرة ………. الوفا معهم خسر كلما تبارا
و(بو عامر) طلتو طابع أميري ………….. بدفا قلبو غمرنا والحرارا
و(وجدي) بلمسة السحر الحريري … سحب إبداع من طهر العذارا
و(خالد) ببسمتو لهفة مثيرة ………….. ما خلى حفلنا يطلع خسارا
و(فراس) من الذهب قلبو الأثيري ……. إبن بيت الأصالة والطهارا
و(طارق) موردو العذب العبيري ….. ندي صافي نزل مثل البشارا
و(مهند) بالحلا روحو شهيرة …….. غني الأخلاق عن حق وجدارا
و(مهند) بالقلب أغلى ذخيرة ………… زرتو وما شبعت من الزيارا
و(إيهاب)و(لورانس) بكل ديرة ……… و(أبو حسام) توجتوا الأمارا
ويا جمهور الإلك قيمة وفيرة …………. وبمرج قلوبنا باني سفارا
معك بالحب طلعنا الخميرة ….. وختمنا عرسنا الخامس تا نبقى
حروف مذهبة بسطر الحضارا

بدون تعليقات

اترك رد